О Иоанне Воине

Деятельность

Записки

Галерея

+7 (951) 804-46-23

hramiv74@mail.ru

Задайте вопрос священнику

Нажимая на кнопку, вы даете согласие на обработку персональных данных и соглашаетесь c политикой конфиденциальности.

Иоанн Воин

Святой мученик Иоанн Воин

Святой мученик Иоанн Воин служил в императорском войске Юлиана Отступника (361–363). Наряду с другими воинами его посылали преследовать и убивать христиан. Оставаясь внешне гонителем, святой Иоанн на деле оказывал гонимым христианам большую помощь: тех, которые были схвачены, освобождал, других предупреждал о грозящей им опасности, содействовал их побегу.

Житие

Святой Иоанн оказывал милосердие не только христианам, но и всем бедствующим и требующим помощи: посещал больных, утешал скорбящих. Когда Юлиан Отступник узнал о действиях святого, то заключил его в темницу. В 363 году император был убит на войне с персами. Святой Иоанн вышел на свободу и посвятил свою жизнь служению ближним, жил в святости и чистоте. Скончался он в глубокой старости.

Год кончины его точно не известен, место погребения святого Иоанна Воина постепенно было забыто. Он явился одной благочестивой женщине и указал место своего упокоения. Оно стало известно в этом округе. Обретенные его мощи были положены в церкви апостола Иоанна Богослова в Константинополе. Господь даровал святым мощам Иоанна Воина благодатную силу исцеления. По молитвам святого Иоанна получают утешение обиженные и скорбящие. В Русской Церкви Иоанн Воин свято чтится как великий помощник в скорбях и в различных житейских обстояниях.

Скачать акафист

А҆ка́ѳїстъ ст҃о́мꙋ мч҃нкꙋ і҆ѡа́ннꙋ во́инꙋ.

Конда́къ а҃.

И҆збра́ннаго раба̀ цр҃ѧ̀ нбⷭ҇нагѡ, до́блѧго хрⷭ҇то́ва страстоте́рпца, і҆ѡа́нна, ст҃а́го во́ина и҆ чꙋдотво́рца, похва́льными пѣ́сньми воспои́мъ, ꙗ҆́кѡ хрⷭ҇тїа́нъ застꙋ́пника, цѣломⷣрїѧ блюсти́телѧ, стра́ждꙋщихъ ᲂу҆тѣ́шителѧ. Ты́ же, предстоѧ̀ прⷭ҇то́лꙋ ст҃ы́ѧ трⷪ҇цы, мл҃твами свои́ми ѿ всѧ́кихъ ѕѡ́лъ и҆ напа́стей ѡ҆хранѧ́й съ вѣ́рою и҆ любо́вїю зовꙋ́щихъ тѝ:
Ра́дꙋйсѧ, і҆ѡа́нне ст҃ы́й, во́ине и҆ пресла́вный чꙋдотво́рче.

І҆́косъ а҃.

А҆рха́гг҃ли и҆ а҆́гг҃ли съ любо́вїю зрѧ́хꙋ на равноа́гг҃льское житїѐ твоѐ, і҆ѡа́нне пречꙋ́дне: ты́ бо, пекі́йсѧ ѡ҆ гдⷭ҇нихъ, ка́кѡ ᲂу҆годи́ти гдⷭ҇еви, сохрани́лъ дѣ́вство неврежде́нно, посто́мъ и҆ мл҃твою ᲂу҆мерщвлѧ́ѧ пло́ть свою̀ де́нь и҆ но́щь. Мы́ же таково́мꙋ житїю̀ твоемꙋ̀ дивѧ́щесѧ, со ᲂу҆миле́нїемъ взыва́емъ тѝ си́це:
Ра́дꙋйсѧ, чⷭ҇тотꙋ̀ се́рдца своегѡ̀ сохрани́вый: ра́дꙋйсѧ, ꙗ҆́кѡ сегѡ̀ ра́ди бг҃а ᲂу҆зрѣ́ти сподо́билсѧ є҆сѝ.
Ра́дꙋйсѧ, и҆́го хрⷭ҇то́во на ра́мо своѐ взе́мшїй: ра́дꙋйсѧ, дꙋ́шꙋ свою̀ хрⷭ҇та̀ ра́ди погꙋби́вый, во є҆́же спⷭ҇тѝ ю҆̀.
Ра́дꙋйсѧ, а҆́гг҃лѡвъ сожи́телю: ра́дꙋйсѧ, дѣ́вственникѡвъ похвало̀.
Ра́дꙋйсѧ, храни́телю и҆ наста́вниче ю҆́ныхъ ѻ҆трокѡ́въ: ра́дꙋйсѧ, ско́рый помо́щниче борю́щымсѧ со страстьмѝ и҆ похотьмѝ.
Ра́дꙋйсѧ, защи́тниче дѣ́въ и҆ вдови́цъ: ра́дꙋйсѧ, ѡ҆бличе́нїе нарꙋши́телей цѣломⷣрїѧ.
Ра́дꙋйсѧ, роди́телей и҆ воспита́телей наста́вниче: ра́дꙋйсѧ, сиро́тствꙋющихъ незри́мый води́телю.
Ра́дꙋйсѧ, і҆ѡа́нне, ст҃ы́й во́ине и҆ пресла́вный чꙋдотво́рче.
Конда́къ в҃.
Ви́дѧ ст҃ы́й і҆ѡа́ннъ, є҆гда̀ прїи́де въ нꙋ́меры и҆фа̑льскїѧ, хрⷭ҇тїа́ны гѡни́мы, не ᲂу҆боѧ́сѧ преще́нїй нечести́вагѡ і҆ꙋлїа́на и҆ речѐ и҆̀мъ: мꙋжа́йтесѧ, ᲂу҆крѣплѧ́йтесѧ въ вѣ́рѣ, да сподо́битесѧ вы́нꙋ воспѣва́ти въ нбⷭ҇ныхъ черто́зѣхъ хрⷭ҇тꙋ̀ бг҃ꙋ: А҆ллилꙋ́їа.

І҆́косъ в҃.

Ра́зꙋмъ несꙋмнѣ́нный и҆мѣ́лъ є҆сѝ въ себѣ̀, і҆ѡа́нне достохва́льне, є҆гда̀ сла́вꙋ мі́ра сегѡ̀ презрѣ́въ и҆ гнѣ́ва ца́рскагѡ не ᲂу҆страши́всѧ, и҆сповѣ́далъ себѐ хрїстїа́нина бы́ти, и҆ сегѡ̀ ра́ди, ꙗ҆́кѡ ѕлодѣ́й, въ темни́цꙋ всажде́нъ бы́лъ є҆сѝ. Таково́мꙋ твоемꙋ̀ ѡ҆ хрⷭ҇тѣ̀ дерзнове́нїю дивѧ́щесѧ, глаго́лемъ:
Ра́дꙋйсѧ, и҆сповѣ́дниче хрⷭ҇то́въ преизрѧ́дный: ра́дꙋйсѧ, хрⷭ҇тꙋ̀ спострада́вый.
Ра́дꙋйсѧ, і҆́дѡльскагѡ слꙋже́нїѧ пре́лесть ѡ҆бличи́вый: ра́дꙋйсѧ, си́лою крⷭ҇та̀ врага̀ побѣди́вый.
Ра́дꙋйсѧ, ꙗ҆́кѡ ᲂу҆́зы и҆ темни́цꙋ за хрⷭ҇та̀ прїѧ́ти сподо́билсѧ є҆сѝ: ра́дꙋйсѧ, ꙗ҆́кѡ хла́дъ и҆ наготꙋ̀ за хрⷭ҇та̀ предпоче́лъ є҆сѝ сла́вѣ грѣхо́внѣй.
Ра́дꙋйсѧ, и҆сповѣ́дникѡвъ похвало̀: ра́дꙋйсѧ, мч҃нкѡвъ ра́дованїе.
Ра́дꙋйсѧ, въ земны́хъ во́инѣхъ до́блїй во́инъ цр҃ѧ̀ нбⷭ҇нагѡ: ра́дꙋйсѧ, ᲂу҆бѣли́вый ри̑зы своѧ̑ въ кро́ви а҆́гнчей.
Ра́дꙋйсѧ, цр҃кве хрⷭ҇то́вы защи́тниче: ра́дꙋйсѧ, всѣ́хъ правосла́вныхъ застꙋ́пниче.
Ра́дꙋйсѧ, і҆ѡа́нне ст҃ы́й, во́ине и҆ пресла́вный чꙋдотво́рче.

Конда́къ г҃.

Си́лою свы́ше препоѧ́санный, возмо́глъ є҆сѝ побѣди́ти дре́внѧго ѕмі́ѧ: то́южде си́лою ѡ҆даре́нный, и҆сточа́еши ѻ҆би́лїе чꙋде́съ всѣ̑мъ призыва́ющымъ съ вѣ́рою и҆́мѧ твоѐ и҆ ѡ҆ тебѣ̀ бл҃года́рнѣ вопїю́щымъ бг҃ꙋ: А҆ллилꙋ́їа.

І҆́косъ г҃.

И҆мѣ́ѧ въ се́рдце свое́мъ тве́рдꙋю вѣ́рꙋ во хрⷭ҇та̀ и҆ си́лою тоѧ̀ воѻрꙋжи́всѧ, не ᲂу҆боѧ́лсѧ є҆сѝ гнѣ́ва царе́ва и҆ сохранѧ́лъ є҆сѝ и҆фа̑льскїѧ лю́ди ѿ мꙋчи́телей. Сегѡ̀ ра́ди таково́е мꙋ́жество твоѐ похвалѧ́юще, бл҃жи́мъ тѧ̀ си́це:
Ра́дꙋйсѧ, а҆дама́нте вѣ́ры хрⷭ҇то́вы: ра́дꙋйсѧ, сто́лпе цр҃кве бж҃їѧ.
Ра́дꙋйсѧ, вѣ́рныхъ наде́ждо и҆ застꙋпле́нїе: ра́дꙋйсѧ, невѣ́рныхъ стра́хъ и҆ посрамле́нїе.
Ра́дꙋйсѧ, вѣне́цъ и҆сповѣ́дника хрⷭ҇то́ва стѧжа́вый: ра́дꙋйсѧ, ѻ҆рꙋ́жїемъ крⷭ҇та̀ врага̀ хрⷭ҇то́ва низложи́вый.
Ра́дꙋйсѧ, хрⷭ҇та̀ па́че мі́ра возлюби́вый: ра́дꙋйсѧ, за хрⷭ҇тїа́ны дꙋ́шꙋ свою̀ положи́вый.
Ра́дꙋйсѧ, за́мыслы бг҃оме́рзкаго мꙋчи́телѧ разсѣ́ѧвый: ра́дꙋйсѧ, ꙗ҆́кѡ въ темни́цѣхъ сꙋ́щихъ и҆ во ᲂу҆́зѣхъ посѣща́лъ є҆сѝ.
Ра́дꙋйсѧ, ꙗ҆́кѡ и҆ са́мъ за хрⷭ҇та̀ въ темни́цꙋ всажде́нъ бы́лъ є҆сѝ: ра́дꙋйсѧ, ꙗ҆́звы гдⷭ҇а своегѡ̀ на тѣ́лѣ носи́вый.
Ра́дꙋйсѧ, і҆ѡа́нне ст҃ы́й, во́ине и҆ пресла́вный чꙋдотво́рче.

Конда́къ д҃.

Бꙋ́рею помышле́нїй сꙋмни́тельныхъ колеба́шесѧ бл҃же́нный і҆ѡа́ннъ, є҆гда̀ по́сланъ бы́сть въ нꙋ́меры и҆фа̑льскїѧ, да мꙋ́читъ та́мѡ вѣ́рꙋющыѧ во хрⷭ҇та̀. А҆́ще ᲂу҆́бѡ, глаго́лаше, по повелѣ́нїю царе́вꙋ и҆́мамъ бл҃говѣ̑рныѧ лю́ди мꙋ́чити и҆ ᲂу҆бива́ти, ѡ҆сꙋжде́нъ бꙋ́дꙋ ѿ бг҃а, а҆́ще же не и҆дꙋ̀ та́мѡ, въ чи́нѣ во́инства моегѡ̀ ѡ҆брѧ́щꙋсѧ царю̀ проти́венъ и҆ пре́данъ бꙋ́дꙋ сме́рти лю́тѣй. Ѻ҆ба́че стра́хомъ бж҃їимъ води́мый, вѣ́рꙋ хрⷭ҇то́вꙋ въ се́рдце свое́мъ сохрани́лъ да́же до ѕлострада́нїй и҆ ᲂу҆́зъ темни́чныхъ, вопїѧ̀ хрⷭ҇тꙋ̀: А҆ллилꙋ́їа.

І҆́косъ д҃.

Слы́шавъ нечести́вый і҆ꙋлїа́нъ твоѐ ко хрⷭ҇тїа́нѡмъ млⷭ҇рдїе и҆ ᲂу҆вѣ́дѣвъ тѧ̀ самаго̀ хрїстїа́нина бы́ти, раз̾ѧри́сѧ на тѧ̀ ѕло́бою и҆ повелѣ̀ привестѝ въ царьгра́дъ, ꙗ҆́кѡ ѕлодѣ́ѧ и҆ проти́вника царе́ва. Ты́ же, бл҃года́тїю бж҃їею ᲂу҆крѣплѧ́емь, страда̑нїѧ претерпѣ́лъ є҆сѝ мꙋ́жественнѡ и҆ ѿ вѣ́ры во хрⷭ҇та̀ ника́коже ѿстꙋпи́лъ є҆сѝ. Сегѡ̀ ра́ди велича́емъ тѧ̀ си́це:
Ра́дꙋйсѧ, и҆сповѣ́дниче вѣ́ры во хрⷭ҇та̀ неꙋстраши́мый: ра́дꙋйсѧ, во́ине хрⷭ҇то́въ непобѣди́мый.
Ра́дꙋйсѧ, ꙗ҆́кѡ со а҆рхїстрати́гами си́лъ нбⷭ҇ныхъ прⷭ҇то́лꙋ бж҃їю предстои́ши: ра́дꙋйсѧ, ско́рый помо́щниче всѣ̑мъ за и҆́стинꙋ терпѧ́щымъ.
Ра́дꙋйсѧ, и҆скꙋше́нїй и҆ собла́знѡвъ ѿ дїа́вола и҆збѣ́гнꙋвый: ра́дꙋйсѧ, ꙗ҆́кѡ и҆ всѣ́хъ призыва́ющихъ тѧ̀ ѿ и҆скꙋше́нїй и҆збавлѧ́еши.
Ра́дꙋйсѧ, за́мыслы бг҃оме́рзкагѡ мꙋчи́телѧ разсѣ́ѧвый: ра́дꙋйсѧ, и҆ на́мъ сѣ́ти дїа́вола и҆збѣга́ти помога́ѧй.
Ра́дꙋйсѧ, щито́мъ вѣ́ры себѐ самаго̀ ѿ стрѣ́лъ лꙋка́вагѡ защити́вый: ра́дꙋйсѧ, и҆́мже и҆ на́съ ѿ и҆скꙋше́нїй ѡ҆хранѧ́ѧй.
Ра́дꙋйсѧ, хрⷭ҇тїа́нскагѡ ро́да ᲂу҆краше́нїе: ра́дꙋйсѧ, нбⷭ҇ныхъ черто́гѡвъ ѡ҆бита́телю.
Ра́дꙋйсѧ, і҆ѡа́нне ст҃ы́й, во́ине и҆ пресла́вный чꙋдотво́рче.

Конда́къ є҃.

Бг҃оте́чнѣй ѕвѣздѣ̀ подо́бенъ бы́лъ є҆сѝ, і҆ѡа́нне, є҆гда̀, прише́дъ въ страны̑ и҆фа̑льскїѧ, ᲂу҆вѣща́лъ є҆сѝ та́мѡ сꙋ́щихъ хрⷭ҇тїа́нъ не ѿстꙋпа́ти ѿ сл҃нца пра́вды хрⷭ҇та̀ бг҃а, но вы́нꙋ пѣ́ти є҆мꙋ̀: А҆ллилꙋ́їа.

І҆́косъ є҃.

Ви́дѧ ст҃ы́й приводи̑мыѧ пред̾ него̀ по повелѣ́нїю царе́вꙋ вѣ̑рныѧ хрⷭ҇тꙋ̀ лю́ди на мꙋче́нїе за вѣ́рꙋ хрⷭ҇то́вꙋ, ѕѣлѡ̀ скорбѣ̀ за ни́хъ, въ се́рдце свое́мъ пекі́йсѧ, да и҆зба́витъ и҆̀хъ ѿ рꙋкѝ мꙋчи́телевы. Таково́е твоѐ попече́нїе ѡ҆ ни́хъ похвалѧ́юще, зове́мъ тѝ:
Ра́дꙋйсѧ, любо́вь хрⷭ҇то́вꙋ въ се́рдце свое́мъ и҆мѣ́вый: ра́дꙋйсѧ, ꙗ҆́кѡ то́ю согрѣва́емь, ѿ мꙋчи́телей вѣ̑рныѧ рабы̀ хрⷭ҇то́вы спаса́лъ є҆сѝ.
Ра́дꙋйсѧ, велѣ̑нїѧ нечести́выхъ презрѣ́вый: ра́дꙋйсѧ, за́повѣди хрⷭ҇тѡ́вы сохрани́вый.
Ра́дꙋйсѧ, вѣ́рныхъ рабѡ́въ хрⷭ҇то́выхъ дрꙋ́же: ра́дꙋйсѧ, хрⷭ҇тїа́нъ застꙋ́пниче.
Ра́дꙋйсѧ, сꙋ́щымъ въ темни́цѣхъ и҆ во ᲂу҆́зѣхъ ᲂу҆тѣ́шителю: ра́дꙋйсѧ, ни́щихъ корми́телю.
Ра́дꙋйсѧ, стра́нныхъ води́телю: ра́дꙋйсѧ, немощствꙋ́ющихъ врачꙋ̀.
Ра́дꙋйсѧ, застꙋ́пниче си́рыхъ: ра́дꙋйсѧ, пла́чꙋщихъ ᲂу҆тѣ́шителю.
Ра́дꙋйсѧ, і҆ѡа́нне ст҃ы́й, во́ине и҆ пресла́вный чꙋдотво́рче.

Конда́къ ѕ҃.

Посто́мъ и҆ мл҃твою пло́ть твою̀ дꙋ́хови порабо́тилъ є҆сѝ и҆ во сла́вꙋ бж҃їю дх҃о́внѣ пожи́лъ є҆сѝ: сегѡ̀ ра́ди ны́нѣ предстои́ши прⷭ҇то́лꙋ прест҃ы́ѧ трⷪ҇цы, вы́нꙋ воспѣва́ѧ пѣ́снь: А҆ллилꙋ́їа.

І҆́косъ ѕ҃.

Возсїѧ́лъ є҆сѝ, ꙗ҆́кѡ но́вое свѣти́ло на тве́рди нбⷭ҇нѣй, всемꙋ̀ хрⷭ҇тїа́нскомꙋ ро́дꙋ, є҆гда̀ бж҃їимъ и҆зволе́нїемъ ѡ҆брѣ́тено бы́сть нетлѣ́нное тѣ́ло твоѐ, и҆сточа́ющее ѻ҆би́лїе чꙋде́съ съ вѣ́рою къ твоемꙋ̀ застꙋпле́нїю притека́ющымъ и҆ мл҃твеннѡ тебѣ̀ взыва́ющымъ:
Ра́дꙋйсѧ, бг҃ꙋ житїе́мъ твои́мъ ᲂу҆годи́вый: ра́дꙋйсѧ, сегѡ̀ ра́ди ѿ негѡ̀ прославле́нїе прїѧ́вый.
Ра́дꙋйсѧ, тщетꙋ̀ и҆ пре́лесть мі́ра сегѡ̀ презрѣ́вый: ра́дꙋйсѧ, мздꙋ̀ нбⷭ҇нꙋю воспрїѧ́вый.
Ра́дꙋйсѧ, ꙗ҆́кѡ ѡ҆ ма́лѣ вѣ́ренъ ꙗ҆ви́лсѧ є҆сѝ: ра́дꙋйсѧ, ꙗ҆́кѡ ѻ҆би́лїе бл҃года́ти бж҃їѧ прїѧ́ти сподо́билсѧ є҆сѝ.
Ра́дꙋйсѧ, ꙗ҆́кѡ въ житїѝ се́мъ бли́жнѧго самоѿве́рженнѡ возлюби́лъ є҆сѝ: ра́дꙋйсѧ, ꙗ҆́кѡ въ ско́рбехъ и҆ напа́стехъ сꙋ́щымъ застꙋ́пникъ бы́лъ є҆сѝ.
Ра́дꙋйсѧ, дꙋ́шꙋ свою̀ за дрꙋ́ги полага́вый: ра́дꙋйсѧ, те́плый хода́таю за на́съ ᲂу҆ цр҃ѧ̀ нбⷭ҇нагѡ.
Ра́дꙋйсѧ, ѿ мꙋчи́телева гнѣ́ва хрⷭ҇тїа́ны спаса́вый: ра́дꙋйсѧ, ꙗ҆́кѡ и҆ дне́сь ѡ҆ сп҃се́нїи на́шемъ пече́шисѧ.
Ра́дꙋйсѧ, і҆ѡа́нне ст҃ы́й, во́ине и҆ пресла́вный чꙋдотво́рче.

Конда́къ з҃.

Хотѧ́щꙋ тѝ ѿ мі́ра сегѡ̀ пресели́тисѧ, смиренномⷣрїемъ побꙋжда́емь, повелѣ́лъ є҆сѝ нѣ́коемꙋ человѣ́кꙋ тѣ́ло твоѐ положи́ти въ до́мѣ, и҆дѣ́же стра́ннїи и҆ ни́щїи погреба́хꙋсѧ. гдⷭ҇ь же, смирє́нныѧ возносѧ́й, бл҃говолѝ сохрани́ти ѻ҆́ное нетлѣ́нно и҆ чꙋдотворє́нїѧ и҆сточа́ющее всѣ̑мъ ко твоемꙋ̀ застꙋпле́нїю съ вѣ́рою притека́ющымъ и҆ ѡ҆ тебѣ̀ бг҃ꙋ вопїю́щымъ: А҆ллилꙋ́їа.

І҆́косъ з҃.

Но́вꙋю показа̀ млⷭ҇ть рабѡ́мъ свои̑мъ чл҃колю́бецъ гдⷭ҇ь, є҆гда̀ бл҃говолѝ просла́вити тѧ̀ и҆ ꙗ҆ви́ти въ тебѣ̀ бл҃года́ть свою̀ чꙋдотворѧ́щꙋ. Мы́ же таково́мꙋ промышле́нїю бж҃їю ра́дꙋющесѧ, бл҃года́рнѣ вопїе́мъ:
Ра́дꙋйсѧ, вмѣсти́лище блгⷣти бж҃їей: ра́дꙋйсѧ, сосꙋ́де бж҃їй и҆збра́нный.
Ра́дꙋйсѧ, чꙋдотво́рче преди́вный: ра́дꙋйсѧ, притека́ющымъ къ тебѣ̀ съ вѣ́рою ско́рꙋю по́мощь подава́ѧй.
Ра́дꙋйсѧ, дꙋше́вныхъ и҆ тѣле́сныхъ недꙋ́гѡвъ на́шихъ цѣли́телю: ра́дꙋйсѧ, бѣсѡ́въ ѡ҆ и҆́мени хрⷭ҇то́вѣ и҆згони́телю.
Ра́дꙋйсѧ, лꙋка́вствїй врага̀ чл҃вѣ́ческагѡ ѡ҆бличи́телю: ра́дꙋйсѧ, цѣломⷣрїѧ ѡ҆храни́телю.
Ра́дꙋйсѧ, бл҃гочести́выхъ сꙋпрꙋ́жествъ ѿ всѧ́кагѡ дїа́вольскагѡ прельще́нїѧ незри́маѧ ѡ҆гра́до: ра́дꙋйсѧ, татьбы̀ и҆ граби́тельства ско́рый ѡ҆бличи́телю.
Ра́дꙋйсѧ, соврати́вшихсѧ на пꙋ́ть и҆́стины настави́телю: ра́дꙋйсѧ, прошє́нїѧ на̑ша на по́льзꙋ и҆сполнѧ́ѧй.
Ра́дꙋйсѧ, і҆ѡа́нне ст҃ы́й, во́ине и҆ пресла́вный чꙋдотво́рче.

Конда́къ и҃.

Стра́нное и҆ ди́вное ꙗ҆вле́нїе твоѐ чрез̾ со́нное видѣ́нїе нѣ́коей женѣ̀ бл҃гоговѣ́йнѣй ᲂу҆вѣ́дѣвше и҆ но́ваго чꙋдотво́рца и҆ ᲂу҆го́дника бж҃їѧ въ тебѣ̀ позна́вше, лю́дїе кѡнстантїнопо́льстїи ᲂу҆мили́шасѧ и҆ возопи́ша бг҃ꙋ: А҆ллилꙋ́їа.

І҆́косъ и҃.

Ве́сь добродѣ́тельми и҆спо́лненный въ жи́зни се́й, по сме́рти же сла́вою бж҃їею ѡ҆заре́нный, преклонѧ́еши ᲂу҆́хо твоѐ на мл҃твы чтꙋ́щихъ тѧ̀, ѿ ни́хже слы́шиши сицева̑ѧ:
Ра́дꙋйсѧ, млⷭ҇рдїю ѻ҆ц҃а̀ нбⷭ҇нагѡ подража́телю: ра́дꙋйсѧ, а҆́лчꙋщихъ пита́телю.
Ра́дꙋйсѧ, стра́нныхъ неви́димый сопꙋ́тниче: ра́дꙋйсѧ, си́рыхъ покрови́телю.
Ра́дꙋйсѧ, ѡ҆ѕлоблѧ́емыхъ ᲂу҆тѣ́шителю: ра́дꙋйсѧ, за и҆́стинꙋ терпѧ́щихъ подкрѣпи́телю.
Ра́дꙋйсѧ, недꙋ́гꙋющымъ ѡ҆сла́бꙋ и҆ и҆сцѣле́нїе подава́ѧй: ра́дꙋйсѧ, въ бѣда́хъ сꙋ́щихъ застꙋ́пниче.
Ра́дꙋйсѧ, ни́щыѧ возлюби́вый: ра́дꙋйсѧ, ꙗ҆́кѡ съ ни́ми и҆ по ѿше́ствїи ѿ мі́ра сегѡ̀ тѣ́ломъ разлꙋчи́тисѧ не восхотѣ́лъ є҆сѝ.
Ра́дꙋйсѧ, ꙗ҆́кѡ въ до́мѣ ᲂу҆бо́гихъ погребстѝ тѣ́ло своѐ завѣща́лъ є҆сѝ: ра́дꙋйсѧ, за смиренномⷣрїе твоѐ вѣнце́мъ ѿ бг҃а ᲂу҆вѣнча́нный.
Ра́дꙋйсѧ, і҆ѡа́нне ст҃ы́й, во́ине и҆ пресла́вный чꙋдотво́рче.

Конда́къ ѳ҃.

Всѐ во́инство а҆́гг҃льское возра́довашесѧ, ви́дѧ тѧ̀ во́ина цр҃ѧ̀ нбⷭ҇нагѡ непреѡбори́ма, побѣди́вша мїродержи́телѧ тмы̀ и҆ пре́лести вѣ́ка сегѡ̀: тѣ́мже и҆ воспѣ̀ бг҃ꙋ: А҆ллилꙋ́їа.

І҆́косъ ѳ҃.

Вѣті̑и многовѣща́ннїи не возмо́гꙋтъ по достоѧ́нїю восхвали́ти страда̑нїѧ твоѧ̑, за хрⷭ҇та̀ претерпѣ̑нныѧ, и҆ млⷭ҇рдїѧ и҆ цѣломⷣрїѧ твоегѡ̀ по́двиги. Мы́ же таковы̑мъ дивѧ́щесѧ, въ не́мощи на́шей ма̑лыѧ сїѧ̑ хвалє́нїѧ прино́симъ тебѣ̀:
Ра́дꙋйсѧ, хрⷭ҇та̀ всѣ́мъ се́рдцемъ возлюби́вый: ра́дꙋйсѧ, вѡ́льнаѧ страда̑нїѧ за и҆́мѧ є҆гѡ̀ претерпѣ́вый.
Ра́дꙋйсѧ, ѡ҆ бз҃ѣ вседержи́теле поревнова́вый: ра́дꙋйсѧ, вѣне́цъ мч҃нческїй стѧжа́вый.
Ра́дꙋйсѧ, пра́вило вѣ́ры и҆ воздержа́нїѧ ᲂу҆чи́телю: ра́дꙋйсѧ, нищетꙋ̀ дꙋхо́внꙋю проѧви́вый.
Ра́дꙋйсѧ, смиренномⷣрїемъ твои́мъ дꙋ́ха горды́ни низложи́вый: ра́дꙋйсѧ, наслѣ́дїе црⷭ҇тва нбⷭ҇нагѡ стѧжа́вый.
Ра́дꙋйсѧ, въ домꙋ̀ ѻ҆ц҃а̀ нбⷭ҇нагѡ ѡ҆би́тель себѣ̀ сотвори́вый: ра́дꙋйсѧ, ꙗ҆́кѡ ѡ҆ сп҃се́нїи на́шемъ при́снѡ хода́тайствꙋеши.
Ра́дꙋйсѧ, по́мощь ско́рꙋю просѧ́щымъ подава́ѧй: ра́дꙋйсѧ, ꙗ҆́кѡ немо́лчнѡ мо́лиши за ны̀ хрⷭ҇та̀ бг҃а.
Ра́дꙋйсѧ, і҆ѡа́нне ст҃ы́й, во́ине и҆ пресла́вный чꙋдотво́рче.

Конда́къ і҃.

Сп҃стѝ хотѧ̀ дꙋ́шꙋ свою̀, презрѣ́лъ є҆сѝ велѣ̑нїѧ мꙋчи́телѧ, и҆ ѡ҆ тѣ́лѣ свое́мъ неради́въ, ра́достнѡ воспрїѧ́лъ є҆сѝ ᲂу҆́зы желѣ̑зныѧ и҆ темни́чнꙋю ско́рбь, і҆ѡа́нне, хрⷭ҇то́въ во́ине, воспѣва́ѧ ᲂу҆крѣплѧ́вшемꙋ тѧ̀ бг҃ꙋ: А҆ллилꙋ́їа.

І҆́косъ і҃.

Стѣна̀ є҆сѝ и҆ тве́рдое прибѣ́жище всѣ̑мъ съ моли́твою къ тебѣ̀ прибѣга́ющымъ, чꙋдотво́рче і҆ѡа́нне, сегѡ̀ ра́ди зове́мъ тѝ:
Ра́дꙋйсѧ, ско́рый послꙋ́шниче всѣ́хъ призыва́ющихъ тѧ̀: ра́дꙋйсѧ, ꙗ҆́кѡ честны́ѧ мѡ́щи твоѧ̑ бл҃говолѝ бг҃ъ просла́вити чꙋдесы̀.
Ра́дꙋйсѧ, ꙗ҆́кѡ и҆ ѿ і҆кѡ́нъ твои́хъ подае́тсѧ блгⷣть бж҃їѧ взира́ющымъ на ни́хъ съ вѣ́рою: ра́дꙋйсѧ, ꙗ҆́кѡ въ созда́нныхъ на прославле́нїе и҆́мене твоегѡ̀ хра́мѣхъ незри́мѡ ѡ҆бита́еши.
Ра́дꙋйсѧ, ꙗ҆́кѡ никто́же та́мѡ съ вѣ́рою молѧ́сѧ то́щь и҆ неꙋслы́шанъ и҆схо́дитъ: ра́дꙋйсѧ, ꙗ҆́кѡ мл҃твами твои́ми подкрѣплѧ́еши на̑ша молє́нїѧ ко прⷭ҇то́лꙋ вседержи́телѧ восходѧ̑щаѧ.
Ра́дꙋйсѧ, ꙗ҆́кѡ коего́ждо прошє́нїѧ предвари́ти тщи́шисѧ: ра́дꙋйсѧ, ꙗ҆́кѡ на стро́потнѣмъ пꙋтѝ грѣха̀ и҆дꙋ́щымъ вразꙋмлє́нїѧ подае́ши.
Ра́дꙋйсѧ, ꙗ҆́кѡ и҆скꙋша́ємымъ ѿ дїа́вола ско́рꙋю по́мощь ꙗ҆влѧ́еши: ра́дꙋйсѧ, ꙗ҆́кѡ всѣ́хъ и҆дтѝ на пꙋ́ть спⷭ҇нїѧ направлѧ̀еши.
Ра́дꙋйсѧ, ꙗ҆́кѡ грѣ̑шныѧ на покаѧ́нїе наставлѧ́еши: ра́дꙋйсѧ, ᲂу҆го́дниче хрⷭ҇то́въ и҆ мл҃твенниче ѡ҆ на́съ бл҃гопрїѧ́тный.
Ра́дꙋйсѧ, і҆ѡа́нне ст҃ы́й, во́ине и҆ пресла́вный чꙋдотво́рче.

Конда́къ а҃і.

Пѣ́нїе похва́льное прино́симъ тебѣ̀, мч҃нче хрⷭ҇то́въ і҆ѡа́нне, є҆́же съ любо́вїю прїе́млѧ, молѝ гдⷭ҇а и҆зба́витисѧ на́мъ ѿ бѣ́дъ и҆ скорбе́й, наипа́че же въ ча́съ кончи́ны на́шеѧ твои́мъ застꙋпле́нїемъ предварѝ, да не ᲂу҆́мремъ безпокаѧ̑нны, но сподо́бимсѧ въ нбⷭ҇ныхъ селе́нїихъ съ тобо́ю воспѣ́ти бг҃ꙋ: А҆ллилꙋ́їа.

І҆́косъ а҃і.

Свѣща̀ є҆сѝ въ цр҃кви хрⷭ҇то́вѣй, горѧ́щи невеще́ственнымъ свѣ́томъ блгⷣти бж҃їѧ и҆ ѡ҆зарѧ́ющи тьмꙋ̀ неразꙋ́мїѧ на́шегѡ, і҆ѡа́нне пребл҃же́нне. Сегѡ̀ ра́ди мо́лимтисѧ: просвѣтѝ ны̀, ѡ҆мрачє́нныѧ грѣхо́мъ, да воспои́мъ тебѣ̀:
Ра́дꙋйсѧ, свѣ́тъ бжⷭ҇твеннагѡ ᲂу҆че́нїѧ въ се́рдце свое́мъ носи́вый: ра́дꙋйсѧ, ꙗ҆́кѡ тѣ́мъ просвѣща́емь, тьмꙋ̀ і҆́дѡльскагѡ слꙋже́нїѧ ѡ҆бличи́лъ є҆сѝ.
Ра́дꙋйсѧ, ꙗ҆́кѡ и҆ на́мъ тѣ́мже свѣ́томъ просвѣти́тисѧ тщи́шисѧ: ра́дꙋйсѧ, ꙗ҆́кѡ сла́вꙋ трисїѧ́ннагѡ бжⷭ҇тва̀ лице́мъ къ лицꙋ̀ зри́ши.
Ра́дꙋйсѧ, лꙋча̀ блгⷣти бж҃їей, ѿ сл҃нца пра́вды возжже́нный: ра́дꙋйсѧ, ѡ҆зарѧ́ѧй тьмꙋ̀ невѣ́дѣнїѧ на́шегѡ свѣ́томъ хрⷭ҇то́выхъ за́повѣдей.
Ра́дꙋйсѧ, пꙋтево́днаѧ ѕвѣздо̀ всѣ̑мъ и҆́щꙋщымъ сп҃се́нїѧ: ра́дꙋйсѧ, ꙗ҆́кѡ наставлѧ́еши на́съ на всѧ́кое дѣ́ло бл҃го́е.
Ра́дꙋйсѧ, ꙗ҆́кѡ мы́сль бл҃гꙋ на́мъ на се́рдце во бл҃говре́менїи полага́еши: ра́дꙋйсѧ, ꙗ҆́кѡ во́инскомꙋ зва́нїю ѡ҆́бразъ до́брагѡ во́ина въ себѣ̀ показꙋ́еши.
Ра́дꙋйсѧ, ѡ҆зари́вый вселе́ннꙋю свѣ́томъ добродѣ́телей твои́хъ: ра́дꙋйсѧ, ꙗ҆́кѡ, ви́дѧще дѡ́браѧ дѣла̀ твоѧ̑, человѣ́цы ѻ҆ц҃а̀ нбⷭ҇наго прославлѧ́ютъ.
Ра́дꙋйсѧ, і҆ѡа́нне ст҃ы́й, во́ине и҆ пресла́вный чꙋдотво́рче.

Конда́къ в҃і.

Блгⷣть дана̀ тебѣ̀ ѿ бг҃а во є҆́же рꙋково́дствовати ко сп҃се́нїю и҆ сохранѧ́ти ѿ бѣ́дъ чтꙋ́щихъ па́мѧть твою̀: сегѡ̀ ра́ди мл҃твами твои́ми ѡ҆градѝ ѿ всѧ́кагѡ ѕла̀ цр҃ковь и҆ странꙋ̀ на́шꙋ, вѣ̑рныѧ же всѧ̑ въ добродѣ́телехъ преꙋспѣва́ти сотворѝ, да воспои́мъ всѝ бг҃ꙋ: А҆ллилꙋ́їа.

І҆́косъ в҃і.

Пою́ще бг҃а, ди́внаго во ст҃ы́хъ свои́хъ, хва́лимъ тѧ̀, хрⷭ҇то́ва и҆сповѣ́дника, во́ина же и҆ чꙋдотво́рца хвале́ньми сицевы́ми:
Ра́дꙋйсѧ, цр҃кве бж҃їѧ ᲂу҆краше́нїе: ра́дꙋйсѧ, къ во́инствꙋ нбⷭ҇номꙋ сопричте́нный.
Ра́дꙋйсѧ, всеѻрꙋ́жїе бж҃їе прїе́мый: ра́дꙋйсѧ, тѣ́мъ всѧ̑ кѡ́зни вра̑жїѧ преодолѣ́вый.
Ра́дꙋйсѧ, броне́ю првⷣности ѡ҆блече́нный: ра́дꙋйсѧ, щито́мъ вѣ́ры ѡ҆сѣне́нный.
Ра́дꙋйсѧ, шле́мъ сп҃се́нїѧ стѧжа́вый: ра́дꙋйсѧ, ме́чь дх҃о́вный, є҆́же є҆́сть сло́во бж҃їе, па́че всѧ́кагѡ ѻ҆рꙋ́жїѧ возлюби́вый.
Ра́дꙋйсѧ, препоѧ́санный ѿ бг҃а пра́вдою и҆ и҆́стиною ѡ҆ чре́слѣхъ свои́хъ: ра́дꙋйсѧ, ꙗ҆́кѡ къ зва̑ннымъ на бра́чнꙋю ве́черю а҆́гнца сопричте́нъ є҆сѝ.
Ра́дꙋйсѧ, ꙗ҆́кѡ та́мѡ воспѣ́ти пѣ́снь но́вꙋ пред̾ прⷭ҇то́ломъ є҆гѡ̀ сподо́билсѧ є҆сѝ: ра́дꙋйсѧ, на нб҃ѣ прїѡбща́ѧйсѧ ны́нѣ хрⷭ҇та̀ и҆́стѣе, не́же и҆ногда̀ на землѝ.
Ра́дꙋйсѧ, і҆ѡа́нне ст҃ы́й, во́ине и҆ пресла́вный чꙋдотво́рче.

Конда́къ г҃і.

Ѽ,ст҃ы́й ᲂу҆го́дниче хрⷭ҇то́въ и҆ чꙋдотво́рче і҆ѡа́нне во́ине. Прїимѝ сїѐ хвале́нїе на́ше и҆ мольбы̑, тебѣ̀ приноси̑мыѧ, и҆ бл҃гопрїѧ́тными твои́ми къ бг҃ꙋ мл҃твами и҆зба́ви на́съ ѿ всѧ́кихъ ѕѡ́лъ и҆ ѡ҆бстоѧ́нїй, болѣ́зней дꙋше́вныхъ и҆ тѣле́сныхъ, и҆ ѿ вѣ́чнагѡ мꙋче́нїѧ предста́тельствомъ твои́мъ сохранѝ и҆ достѡ́йны црⷭ҇твїѧ нбⷭ҇нагѡ бы́ти ᲂу҆молѝ, да сподо́бимсѧ въ нбⷭ҇ныхъ селе́нїихъ воспѣва́ти бг҃ꙋ: А҆ллилꙋ́їа.

Се́й конда́къ глаго́ли три́жды, посе́мъ а҃-й і҆́косъ и҆ а҃-й конда́къ.

І҆́косъ а҃.

Конда́къ а҃.

Моли́тва.

Ѽ,пресла́вный ᲂу҆го́дниче хрⷭ҇то́въ і҆ѡа́нне во́инственниче, хра́брый є҆сѝ въ ра́техъ, врагѡ́мъ прогони́тель и҆ ѡ҆би̑димымъ застꙋ́пникъ, всѣ̑мъ правосла̑внымъ хрⷭ҇тїа́нѡмъ вели́кїй застꙋ́пниче и҆ ᲂу҆го́дниче хрⷭ҇то́въ. Помѧнѝ на́съ, грѣ́шныхъ и҆ недосто́йныхъ рабѡ́въ, въ бѣда́хъ, въ ско́рбехъ и҆ печа́лехъ, и҆ во всѧ́цѣй ѕлѣ́й напа́сти, и҆ ѿ всѧ́кагѡ ѕла́гѡ и҆ ѡ҆би́дѧщагѡ человѣ́ка защитѝ на́съ: дана̀ бо тебѣ̀ блгⷣть ѿ бг҃а мл҃тисѧ за на́съ, грѣ́шныхъ, ѕлѣ̀ стра́ждꙋщихъ. И҆зба́ви на́съ ѿ ѡ҆би́дѧщихъ на́съ, бꙋ́ди на́мъ побо́рникъ крѣ́покъ на всѧ̑ ви̑димыѧ и҆ неви̑димыѧ врагѝ на́шѧ, ꙗ҆́кѡ да твое́ю по́мощїю и҆ крѣ́пкимъ предста́тельствомъ посра́мѧтсѧ всѝ ꙗ҆влѧ́ющїи на́мъ ѕла́ѧ! Ѽ, вели́кїй побо́рниче і҆ѡа́нне во́инственниче. Не забꙋ́ди на́съ, грѣ́шныхъ, молѧ́щихсѧ тебѣ̀ и҆ просѧ́щихъ по́мощи и҆ неѡскꙋ́дныѧ млⷭ҇ти, и҆ ᲂу҆молѝ ѡ҆ на́съ, грѣ́шныхъ и҆ недосто́йныхъ рабѣ́хъ, полꙋчи́ти ѿ бг҃а неизречє́ннаѧ бл҃га̑ѧ, ꙗ҆́же ᲂу҆готѡ́вана лю́бѧщымъ є҆го̀, ꙗ҆́кѡ подоба́етъ є҆мꙋ̀ всѧ́каѧ сла́ва, че́сть и҆ поклоне́нїе, ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.

Акафист святому мученику Иоанну Воину

Кондак 1

Избра́ннаго раба́ Царя́ Небе́снаго, до́бляго Христо́ва страстоте́рпца, Иоа́нна свята́го Во́ина и чудотво́рца похва́льными пе́сньми воспои́м, я́ко христиа́н засту́пника, целому́дрия блюсти́теля, стра́ждущих уте́шителя. Ты же, предстоя́ Престо́лу Святы́я Тро́ицы, моли́твами свои́ми от вся́ких зол и напа́стей охраня́й с ве́рою и любо́вию зову́щих ти:
Ра́дуйся, Иоа́нне, святы́й Во́ине и пресла́вный чудотво́рче.

Икос 1

Арха́нгели и А́нгели с любо́вию зря́ху на равноа́нгельское житие́ твое́, Иоа́нне пречу́дне, ты бо, пеки́йся о Госпо́дних, ка́ко угоди́ти Го́сподеви, сохрани́л де́вство неврежде́нно, посто́м и моли́твою умерщвля́я плоть свою́ день и нощь. Мы же таково́му житию́ твоему́ дивя́щеся, со умиле́нием взыва́ем ти си́це:
Ра́дуйся, чистоту́ се́рдца своего́ сохрани́вый;
ра́дуйся, я́ко сего́ ра́ди Бо́га узре́ти сподо́бился еси́.
Ра́дуйся, и́го Христо́во на ра́мо свое́ взе́мший;
ра́дуйся, ду́шу свою́ Христа́ ра́ди погуби́вый, во е́же спасти́ ю.
Ра́дуйся, А́нгелов сожи́телю;
ра́дуйся, де́вственников похвало́.
Ра́дуйся, храни́телю и наста́вниче ю́ных отроко́в;
ра́дуйся, ско́рый помо́щниче борю́щимся со страстьми́ и похотьми́.
Ра́дуйся, защи́тниче дев и вдови́ц;
ра́дуйся, обличе́ние наруши́телей целому́дрия.
Ра́дуйся, роди́телей и воспита́телей наста́вниче;
ра́дуйся, сиро́тствующих незри́мый води́телю.
Ра́дуйся, Иоа́нне, святы́й Во́ине и пресла́вный чудотво́рче.

Кондак 2

Ви́дя святы́й Иоа́нн, егда́ прии́де в Ну́меры Ифа́льския, христиа́ны гони́мы, не убоя́ся преще́ний нечести́ваго Иулиа́на и рече́ им: мужа́йтеся, укрепля́йтеся в ве́ре, да сподо́битеся вы́ну воспева́ти в Небе́сных черто́зех Христу́ Бо́гу: Аллилу́иа.

Икос 2

Ра́зум несумне́нный име́л еси́ в себе́, Иоа́нне достохва́льне, егда́ сла́ву ми́ра сего́ презре́в и гне́ва ца́рскаго не устраши́вся, испове́дал себе́ христиа́нина бы́ти, и сего́ ра́ди, я́ко злоде́й, в темни́цу всажде́н был еси́. Таково́му твоему́ о Христе́ дерзнове́нию дивя́щеся, глаго́лем:
Ра́дуйся, испове́дниче Христо́в преизря́дный;
ра́дуйся, Христу́ спострада́вый.
Ра́дуйся, и́дольскаго служе́ния пре́лесть обличи́вый;
ра́дуйся, си́лою Креста́ врага́ победи́вый.
Ра́дуйся, я́ко у́зы и темни́цу за Христа́ прия́ти сподо́бился еси́;
ра́дуйся, я́ко хлад и наготу́ за Христа́ предпоче́л еси́ сла́ве грехо́вней.
Ра́дуйся, испове́дников похвало́;
ра́дуйся, му́чеников ра́дование.
Ра́дуйся, в земны́х во́инех до́блий во́ин Царя́ Небе́снаго;
ра́дуйся, убели́вый ри́зы своя́ в Кро́ви А́гнчей.
Ра́дуйся, Це́ркве Христо́вы защи́тниче;
ра́дуйся, всех правосла́вных засту́пниче.
Ра́дуйся, Иоа́нне, святы́й Во́ине и пресла́вный чудотво́рче.

Кондак 3

Си́лою свы́ше препоя́санный возмо́гл еси́ победи́ти дре́вняго зми́я; то́южде си́лою одаре́нный, источа́еши оби́лие чуде́с всем призыва́ющим с ве́рою и́мя твое́ и о тебе́ благода́рне вопию́щим Бо́гу: Аллилу́иа.

Икос 3

Име́я в се́рдце свое́м тве́рдую ве́ру во Христа́ и си́лою тоя́ вооружи́вся, не убоя́лся еси́ гне́ва царе́ва и сохраня́л еси́ ифа́льския лю́ди от мучи́телей. Сего́ ра́ди таково́е му́жество твое́ похваля́юще, блажи́м тя си́це:
Ра́дуйся, адама́нте ве́ры Христо́вы;
ра́дуйся, сто́лпе Це́ркве Бо́жия.
Ра́дуйся, ве́рных наде́ждо и заступле́ние;
ра́дуйся, неве́рных страх и посрамле́ние.
Ра́дуйся, вене́ц испове́дника Христо́ва стяжа́вый;
ра́дуйся, ору́жием Креста́ врага́ Христо́ва низложи́вый.
Ра́дуйся, Христа́ па́че ми́ра возлюби́вый;
ра́дуйся, за христиа́ны ду́шу свою́ положи́вый.
Ра́дуйся, за́мыслы богоме́рзкаго мучи́теля разсе́явый;
ра́дуйся, я́ко в темни́цех су́щих и во у́зех посеща́л еси́.
Ра́дуйся, я́ко и сам за Христа́ в темни́цу всажде́н был еси́;
ра́дуйся, я́звы Го́спода своего́ на те́ле носи́вый.
Ра́дуйся, Иоа́нне, святы́й Во́ине и пресла́вный чудотво́рче.

Кондак 4

Бу́рею помышле́ний сумни́тельных колеба́шеся блаже́нный Иоа́нн, егда́ по́слан бысть в Ну́меры Ифа́льския, да му́чит та́мо ве́рующия во Христа́. «А́ще у́бо, — глаго́лаше, — по повеле́нию царе́ву и́мам благове́рныя лю́ди му́чити и убива́ти, осужде́н бу́ду от Бо́га, а́ще же не иду́ та́мо, в чи́не во́инства моего́ обря́щуся царю́ проти́вен и преда́н бу́ду сме́рти лю́тей». Оба́че стра́хом Бо́жиим води́мый, ве́ру Христо́ву в се́рдце свое́м сохрани́л да́же до злострада́ний и уз темни́чных, вопия́ Христу́: Аллилу́иа.

Икос 4

Слы́шав нечести́вый Иулиа́н твое́ ко христиа́ном милосе́рдие и уве́дев тя самаго́ христиа́нина бы́ти, разъяри́ся на тя зло́бою и повеле́ привести́ в Царьгра́д, я́ко злоде́я и проти́вника царе́ва. Ты же, благода́тию Бо́жиею укрепля́емь, страда́ния претерпе́л еси́ му́жественно и от ве́ры во Христа́ ника́коже отступи́л еси́. Сего́ ра́ди велича́ем тя си́це:
Ра́дуйся, испове́дниче ве́ры во Христа́ неустраши́мый;
ра́дуйся, во́ине Христо́в непобеди́мый.
Ра́дуйся, я́ко со Архистрати́гами Сил Небе́сных Престо́лу Бо́жию предстои́ши;
ра́дуйся, ско́рый помо́щниче всем за и́стину терпя́щим.
Ра́дуйся, искуше́ний и собла́знов от диа́вола избе́гнувый;
ра́дуйся, я́ко и всех призыва́ющих тя от искуше́ний избавля́еши.
Ра́дуйся, за́мыслы богоме́рзкаго мучи́теля разсе́явый;
ра́дуйся, и нам се́ти диа́вола избега́ти помога́ющий.
Ра́дуйся, щито́м ве́ры себя́ самаго́ от стрел лука́ваго защити́вый;
ра́дуйся, и́мже и нас от искуше́ний охраня́ющий.
Ра́дуйся, христиа́нскаго ро́да украше́ние;
ра́дуйся, Небе́сных черто́гов обита́телю.
Ра́дуйся, Иоа́нне, святы́й Во́ине и пресла́вный чудотво́рче.

Кондак 5

Боготе́чней звезде́ подо́бен был еси́, Иоа́нне, егда́, прише́д в страны́ Ифа́льския, увеща́л еси́ та́мо су́щих христиа́н не отступа́ти от Со́лнца Пра́вды Христа́ Бо́га, но вы́ну пе́ти Ему́: Аллилу́иа.

Икос 5

Ви́дя святы́й приводи́мыя пред него́ по повеле́нию царе́ву ве́рныя Христу́ лю́ди на муче́ние за ве́ру Христо́ву, зело́ скорбе́ за них, в се́рдце свое́м пеки́йся, да изба́вит их от руки́ мучи́телевы. Таково́е твое́ попече́ние о них похваля́юще, зове́м ти:
Ра́дуйся, любо́вь Христо́ву в се́рдце свое́м име́вый;
ра́дуйся, я́ко то́ю согрева́емь от мучи́телей ве́рныя рабы́ Христо́вы спаса́л еси́.
Ра́дуйся, веле́ния нечести́вых презре́вый;
ра́дуйся, за́поведи Христо́вы сохрани́вый.
Ра́дуйся, ве́рных рабо́в Христо́вых дру́же;
ра́дуйся, христиа́н засту́пниче.
Ра́дуйся, су́щим в темни́цех и во у́зех уте́шителю;
ра́дуйся, ни́щих корми́телю.
Ра́дуйся, стра́нных води́телю;
ра́дуйся, немощству́ющих врачу́.
Ра́дуйся, засту́пниче си́рых;
ра́дуйся, пла́чущих уте́шителю.
Ра́дуйся, Иоа́нне, святы́й Во́ине и пресла́вный чудотво́рче.

Кондак 6

Посто́м и моли́твою плоть твою́ ду́хови порабо́тил еси́ и во сла́ву Бо́жию духо́вне пожи́л еси́; сего́ ра́ди ны́не предстои́ши Престо́лу Пресвяты́я Тро́ицы, вы́ну воспева́я песнь: Аллилу́иа.

Икос 6

Возсия́л еси́, я́ко но́вое свети́ло на тве́рди небе́сней, всему́ христиа́нскому ро́ду, егда́ Бо́жиим изволе́нием обре́тено бысть нетле́нное те́ло твое́, источа́ющее оби́лие чуде́с с ве́рою к твоему́ заступле́нию притека́ющим и моли́твенно тебе́ взыва́ющим:
Ра́дуйся, Бо́гу житие́м твои́м угоди́вый;
ра́дуйся, сего́ ра́ди от Него́ прославле́ние прия́вый.
Ра́дуйся, тщету́ и пре́лесть ми́ра сего́ презре́вый;
ра́дуйся, мзду Небе́сную восприя́вый.
Ра́дуйся, я́ко о ма́ле ве́рен яви́лся еси́;
ра́дуйся, я́ко оби́лие благода́ти Бо́жией прия́ти сподо́бился еси́.
Ра́дуйся, я́ко в житии́ сем бли́жняго самоотве́рженно возлюби́л еси́;
ра́дуйся, я́ко в ско́рбех и напа́стех су́щим засту́пник был еси́.
Ра́дуйся, ду́шу свою́ за дру́ги полага́вый;
ра́дуйся, те́плый хода́таю за нас у Царя́ Небе́снаго.
Ра́дуйся, от мучи́телева гне́ва христиа́ны спаса́вый;
ра́дуйся, я́ко и днесь о спасе́нии на́шем пече́шися.
Ра́дуйся, Иоа́нне, святы́й Во́ине и пресла́вный чудотво́рче.

Кондак 7

Хотя́щу ти от ми́ра сего́ пресели́тися, смиренному́дрием побужда́ем, повеле́л еси́ не́коему челове́ку те́ло твое́ положи́ти в до́ме, иде́же стра́ннии и ни́щии погреба́хуся. Госпо́дь же, смире́нныя вознося́й, благоволи́ сохрани́ти о́ное нетле́нно и чудотворе́ния источа́ющее всем ко твоему́ заступлению с ве́рою притека́ющим и о тебе́ Бо́гу вопию́щим: Аллилу́иа.

Икос 7

Но́вую показа́ ми́лость рабо́м Свои́м Человеколю́бец Госпо́дь, егда́ благоволи́ просла́вити тя и яви́ти в тебе́ благода́ть Свою́ чудотворя́щу. Мы же таково́му промышле́нию Бо́жию ра́дующеся, благода́рне вопие́м:
Ра́дуйся, вмести́лище благода́ти Бо́жией;
ра́дуйся, сосу́де Бо́жий избра́нный.
Ра́дуйся, чудотво́рче преди́вный;
ра́дуйся, притека́ющим к тебе́ с ве́рою ско́рую по́мощь подава́яй.
Ра́дуйся, душе́вных и теле́сных неду́гов на́ших цели́телю;
ра́дуйся, бесо́в о и́мени Христо́ве изгони́телю.
Ра́дуйся, лука́вство врага́ челове́ческаго обличи́телю;
ра́дуйся, целому́дрия охрани́телю.
Ра́дуйся, благочести́вых супру́жеств от вся́каго диа́вольскаго прельще́ния незри́мая огра́до;
ра́дуйся, татьбы́ и граби́тельства ско́рый обличи́телю.
Ра́дуйся, соврати́вшихся на путь и́стины наста́вителю;
ра́дуйся, проше́ния на́ша на по́льзу исполня́яй.
Ра́дуйся, Иоа́нне, святы́й Во́ине и пресла́вный чудотво́рче.

Кондак 8

Стра́нное и ди́вное явле́ние твое́ чрез со́нное виде́ние не́коей жене́ благогове́йней уве́девшей и но́ваго чудотво́рца и уго́дника Бо́жия в тебе́ позна́вшей, лю́дие константино́польстии умили́шася и возопи́ша Бо́гу: Аллилу́иа.

Икос 8

Весь доброде́тельми испо́лненный в жи́зни сей, по сме́рти же сла́вою Бо́жиею озаре́нный, преклоня́еши у́хо твое́ на моли́твы чту́щих тя, от ни́хже слы́шиши сицева́я:
Ра́дуйся, милосе́рдию Отца́ Небе́снаго подража́телю;
ра́дуйся, а́лчущих пита́телю.
Ра́дуйся, стра́нных неви́димый сопу́тниче;
ра́дуйся, си́рых покрови́телю.
Ра́дуйся, озлобля́емых уте́шителю;
ра́дуйся, за и́стину терпя́щих подкрепи́телю.
Ра́дуйся, неду́гующим осла́бу и исцеле́ние подава́яй;
ра́дуйся, в беда́х су́щих засту́пниче.
Ра́дуйся, ни́щия возлюби́вый;
ра́дуйся, я́ко с ни́ми и по отше́ствии от ми́ра сего́ те́лом разлучи́тися не восхоте́л еси́.
Ра́дуйся, я́ко в до́ме убо́гих погребсти́ те́ло свое́ завеща́л еси́;
ра́дуйся, за смиренному́дрие твое́ венце́м от Бо́га увенча́нный.
Ра́дуйся, Иоа́нне, святы́й Во́ине и пресла́вный чудотво́рче.

Кондак 9

Все во́инство а́нгельское возра́довашеся, ви́дя тя, во́ина Царя́ Небе́снаго непреобори́ма, победи́вша миродержи́теля тьмы и пре́лести ве́ка сего́, те́мже и воспе́ Бо́гу: Аллилу́иа.

Икос 9

Вити́и многовеща́ннии не возмо́гут по достоя́нию восхвали́ти страда́ния твоя́, за Христа́ претерпе́нныя, и милосе́рдия и целому́дрия твоего́ по́двиги. Мы же таковы́м дивя́щеся, в не́мощи на́шей ма́лыя сия́ хвале́ния прино́сим тебе́:
Ра́дуйся, Христа́ всем се́рдцем возлюби́вый;
ра́дуйся, во́льная страда́ния за И́мя Его́ претерпе́вый.
Ра́дуйся, о Бо́зе Вседержи́теле поревнова́вый;
ра́дуйся, вене́ц му́ченический стяжа́вый.
Ра́дуйся, пра́вило ве́ры и воздержа́ния учи́телю;
ра́дуйся, нищету́ духо́вную прояви́вый.
Ра́дуйся, смиренному́дрием твои́м ду́ха горды́ни низложи́вый;
ра́дуйся, насле́дие Ца́рства Небе́снаго стяжа́вый.
Ра́дуйся, в дому́ Отца́ Небе́снаго оби́тель себе́ сотвори́вый;
ра́дуйся, я́ко о спасе́нии на́шем при́сно хода́тайствуеши.
Ра́дуйся, по́мощь ско́рую прося́щим подава́яй;
ра́дуйся, я́ко немо́лчно мо́лиши за ны Христа́ Бо́га.
Ра́дуйся, Иоа́нне, святы́й Во́ине и пресла́вный чудотво́рче.

Кондак 10

Спасти́ хотя́ ду́шу свою́, презре́л еси́ веле́ния мучи́теля, и о те́ле свое́м неради́в, ра́достно восприя́л еси́ у́зы желе́зныя и темни́чную скорбь, Иоа́нне, Христо́в Во́ине, воспева́я укрепля́вшему тя Бо́гу: Аллилу́иа.

Икос 10

Стена́ еси́ и тве́рдое прибе́жище всем с моли́твою к тебе́ прибега́ющим, чудотво́рче Иоа́нне, сего́ ра́ди зове́м ти:
Ра́дуйся, ско́рый послу́шниче всех призыва́ющих тя;
ра́дуйся, я́ко честны́я мо́щи твоя́ благоволи́ Бог просла́вити чудесы́.
Ра́дуйся, я́ко и от ико́н твои́х подае́тся благода́ть Бо́жия взира́ющим на них с ве́рою;
ра́дуйся, я́ко в созда́нных на прославле́ние и́мене твоего́ хра́мех незри́мо обита́еши.
Ра́дуйся, я́ко никто́же та́мо с ве́рою моля́щийся тощ и неуслы́шан исхо́дит;
ра́дуйся, я́ко моли́твами твои́ми подкрепля́еши на́ша моле́ния, ко Престо́лу Вседержи́теля восходя́щия.
Ра́дуйся, я́ко коего́ждо проше́ния предвари́ти тщи́шися;
ра́дуйся, я́ко на стро́потнем пути́ греха́ иду́щим вразумле́ния подае́ши.
Ра́дуйся, я́ко искуша́емым от диа́вола ско́рую по́мощь явля́еши;
ра́дуйся, я́ко всех идти́ на путь спасе́ния направля́еши.
Ра́дуйся, я́ко гре́шныя на покая́ние наставля́еши;
ра́дуйся, уго́дниче Христо́в и моли́твенниче о нас благоприя́тный.
Ра́дуйся, Иоа́нне, святы́й Во́ине и пресла́вный чудотво́рче.

Кондак 11

Пе́ние похва́льное прино́сим тебе́, му́чениче Христо́в Иоа́нне, е́же с любо́вию прие́мля, моли́ Го́спода избавитися нам от бед и скорбе́й, наипа́че же в час кончи́ны на́шея твои́м заступле́нием предвари́, да не у́мрем безпокая́нны, но сподо́бимся в Небе́сных селе́ниих с тобо́ю воспе́ти Бо́гу: Аллилу́иа.

Икос 11

Свеща́ еси́ в це́ркви Христо́вей, горя́щи невеще́ственным све́том благода́ти Бо́жией и озаря́ющи тьму неразу́мия на́шего, Иоа́нне преблаже́нне. Сего́ ра́ди мо́лим ти ся: просвети́ ны, омраче́нныя грехо́м, да воспои́м тебе́:
Ра́дуйся, свет Боже́ственнаго уче́ния в се́рдце свое́м носи́вый;
ра́дуйся, я́ко тем просвеща́емь, тьму и́дольскаго служе́ния обличи́л еси́.
Ра́дуйся, я́ко и нам те́мже све́том просвети́тися тщи́шися;
ра́дуйся, я́ко сла́ву Трисия́ннаго Божества́ лице́м к Лицу́ зри́ши.
Ра́дуйся, лучу́ благода́ти Бо́жией, от Со́лнца Пра́вды возжже́нный;
ра́дуйся, озаря́яй тьму неве́дения на́шего све́том Христо́вых за́поведей.
Ра́дуйся, путево́дная звезда́ всем и́щущим спасе́ния;
ра́дуйся, я́ко наставля́еши нас на вся́кое де́ло благо́е.
Ра́дуйся, я́ко мысль бла́гу нам на се́рдце во благовре́мении полага́еши;
ра́дуйся, я́ко во́инскому зва́нию о́браз до́браго во́ина в себе́ показу́еши.
Ра́дуйся, озари́вый вселе́нную све́том доброде́телей твои́х;
ра́дуйся, я́ко, ви́дя до́брая де́ла твоя́, челове́цы Отца́ Небе́снаго прославля́ют.
Ра́дуйся, Иоа́нне, святы́й Во́ине и пресла́вный чудотво́рче.

Кондак 12

Благода́ть дана́ тебе́ от Бо́га во е́же руково́дствовати ко спасе́нию и сохраня́ти от бед чту́щих па́мять твою́, сего́ ра́ди моли́твами твои́ми огради́ от вся́каго зла Це́рковь и страну́ Росси́йскую, ве́рныя же вся в доброде́телех преуспева́ти сотвори́, да воспои́м вси Бо́гу: Аллилу́иа.

Икос 12

Пою́ще Бо́га, ди́внаго во святы́х Свои́х, хва́лим тя, Христо́ва испове́дника, во́ина же и чудотво́рца хвале́ньми сицевы́ми:
Ра́дуйся, Це́ркве Бо́жия украше́ние;
ра́дуйся, к во́инству Небе́сному сопричте́нный.
Ра́дуйся, всеору́жие Бо́жие прие́мый;
ра́дуйся, тем вся ко́зни вра́жия преодоле́вый.
Ра́дуйся, броне́ю пра́ведности облече́нный;
ра́дуйся, щито́м ве́ры осене́нный.
Ра́дуйся, шлем спасе́ния стяжа́вый;
ра́дуйся, меч духо́вный, е́же есть сло́во Бо́жие, па́че вся́каго ору́жия возлюби́вый.
Ра́дуйся, препоя́санный от Бо́га пра́вдою и и́стиною о чре́слех свои́х;
ра́дуйся, я́ко к зва́нным на бра́чную ве́черю А́гнца сопричте́н еси́.
Ра́дуйся, я́ко та́мо воспе́ти песнь но́ву пред Престо́лом Его́ сподо́бился еси́;
ра́дуйся, на Не́бе приобща́яйся ны́не Христа́ и́стее, не́же иногда́ на земли́.
Ра́дуйся, Иоа́нне, святы́й Во́ине и пресла́вный чудотво́рче.

Кондак 13

О святы́й уго́дниче Христо́в и чудотво́рче Иоа́нне Во́ине! Приими́ сие́ хвале́ние на́ше и мольбы́ тебе́ приноси́мыя, и благоприя́тными твои́ми к Бо́гу моли́твами изба́ви нас от вся́ких зол и обстоя́ний, боле́зней душе́вных и теле́сных, и от ве́чнаго муче́ния предста́тельством твои́м сохрани́ и досто́йны Ца́рствия Небе́снаго бы́ти умоли́, да сподо́бимся в Небе́сных селе́ниих воспева́ти Бо́гу: Аллилу́иа.

[Се́й конда́к глаго́лется три́жды.]

[Далее повторяем 1‑е икос и кондак:]

Икос 1

Кондак 1

Моли́тва

О, му́чениче Христо́в, Иоа́нне во́ине! Хра́брый еси́ во бра́нех, и враго́м прогони́тель, и оби́димым засту́пник, всем правосла́вным христиа́ном. О, вели́кий засту́пниче и уго́дниче Христо́в, Иоа́нне во́инственниче! Поми́луй нас, гре́шных и недосто́йных, и заступи́ в беда́х и в ско́рбех, и в печа́лех, и во вся́кой злой напа́сти, и от вся́каго зла́го и оби́дящаго челове́ка, тебе́ бо дана́ бысть такова́я благода́ть от Бо́га, е́же моли́тися за ны, гре́шныя, в беда́х и напа́стех зле стра́ждущия. Изба́ви у́бо нас от оби́дящих и ненави́дящих, бу́ди нам побо́рник кре́пок на вся ви́димыя и неви́димыя враги́ на́ша. О, вели́кий побо́рниче, Иоа́нне во́ине! Не забу́ди нас, всегда́ моля́щихся тебе́, прося́щих по́мощи и неоску́дныя ми́лости твоея́, и сподо́би нас, гре́шных и недосто́йных, получи́ти от Бо́га неизрече́нная блага́я, я́же угото́ва лю́бящим Его́. Я́ко подоба́ет Ему́ всякая сла́ва, честь и поклоне́ние, Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.